جۇبانيازوۆتار – الماتى سۋرەتشىلەرىنىڭ اراسىنداعى تانىمال وتباسى. العاش رەت اۋلەتتىڭ كاسىبي شىعارماشىلىق ىرگەسىن قر ەڭبەك سىڭىرگەن مادەنيەت قايراتكەرى, سۋرەتشىلەر وداعىنىڭ مۇشەسى قۋاندىق ناۋرىزباي ۇلى جۇبانيازوۆ (1947–2007) جانە ونىڭ جۇبايى ءداستۇرلى قولدانبالى ونەر يەسى, قر ەڭبەك سىڭىرگەن مادەنيەت قايراتكەرى كۇليپا ەسىمقىزى قالادى.
ءىس-شارانىڭ اشىلۋ بارىسىندا ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا اتالمىش كورمەنىڭ «قازاقستاننىڭ ونەرپاز اۋلەتتەرى» اتتى جاڭا جوبانىڭ باستاۋى ەكەنىن بەلگىلەدى.
ەلىمىزدە مادەني مۇرامىزدى دارىپتەۋ جانە ساقتاۋ, ونەرپازدار اۋلەتىن قولداۋ ماسەلەلەرى وزەكتى بولىپ وتىر. جۇبانيازوۆتار ءۇيى ءبىزدى قازاقستان مادەنيەتىنىڭ كەزەڭدەرىنە سايكەس ورىنداعان بىرقاتار بۋىن جۇمىستارىمەن قىزىقتىردى. ولاردىڭ شىعارماشىلىعىندا ساندىك-قولدانبالى ونەر مەن كوركەم ونەردىڭ ءداستۇرلى تەحنيكالارى ۇتىمدى ۇيلەسەدى. كورمەنىڭ ماقتانىشى رەتىندە ونەرپازدار اۋلەتىن قالاعان قۋاندىق جۇبانيازوۆتىڭ 80-90 جىلدارداعى جۇمىستارى ۇسىنىلعان. كورمەدە كىلەم توقۋ ونەرىنىڭ داستۇرىنە ادال كۇليپا جۇبانيازوۆانىڭ ەڭ ۇزدىك ءتۇس كىلەمدەرى دە بار, - دەدى كۇلايشا قابدۋاليقىزى.
كۇليپا ەسىمقىزىنىڭ شىعارماشىلىق ماماندىقتى تاڭداۋىنا بۇل سالادا جۇرگەن اتا-اناسى ىقپال ەتكەن. ولار كيىز ءۇي جابدىقتارىن ءوز قولدارىمەن جاساي بىلگەن حالىق شەبەرلەرى, جيىپ-تەرگەن ءبىلىمى مەن تاجىريبەسىن بالالارىنا بەرگەن ۇستالار.
– اتا-انامىز بىزگە ءجۇن ءيىرۋ, كيىز توسەۋ, ماتا تىگۋ سەكىلدى ۇلتتىق قولونەر تۇرلەرىنىڭ قىر-سىرىن جاستايىمىزدان ۇيرەتۋشى ەدى. سول تاربيەگە دەگەن العىس رەتىندە «شەبەرلەر» ءتۇس كىلەمىن ولارعا ارنادىم, - دەيدى ول.
شىعارماشىلىقپەن اينالىساتىن كەز كەلگەن وتباسىنىڭ داستۇرىنە اينالعان مۇرا سەكىلدى, جۇبانيازوۆتار اۋلەتىنىڭ بالالارى دا اتا-اناسىنىڭ ونەردەگى ءىسىن جالعاستىرۋدا. قىزى گۇلنار جۇبانيازوۆا – سۋرەتشى, ساندىك-قولدانبالى ونەر شەبەرى, ونەرتانۋ ماگيسترى, قازاقستان سۋرەتشىلەر وداعىنىڭ مۇشەسى, ال ۇلى نۇرسۇلتان جۇبانيازوۆ – ءمۇسىنشى ءارى سۋرەتشى, رەسپۋبليكالىق جانە شەتەلدىك پلاستيكا ونەرى كورمەسىنىڭ قاتىسۋشىسى.
– جۇبايىم ەكەۋىمىز گۇلناردىڭ ءبىز تاڭداعان جولمەن ءجۇرىپ, ءبىز كەشكەن قيىندىقتارعا تاپ بولعانىن قالامادىق. ونى قىزدار پەداگوگيكالىق ينستيتۋىنا وقۋعا تۇسۋگە كوندىردىك. سوعان قاراماستان, قىزىمىز سۋرەت سالۋمەن اينالىستى, رەسەي, فرانتسيا ەلدەرىندە وتكەن جاس سۋرەتشىلەر كورمەلەرىنە قاتىسىپ, قازاقستان سۋرەتشىلەر وداعىنىڭ مۇشەسى اتاندى. اقىرى ول اكادەمياعا وقۋعا ءتۇسىپ, ونەرتانۋ سالاسىنىڭ مامانىنا اينالدى.
گۇلنار جۇبانيازوۆانىڭ ايتۋىنشا, ول ءۇشىن اتالمىش كورمەدە «مەنىڭ قازاقستانىم», ء«ومىر جالعاسى» اتتى اناسىنىڭ ءتۇس كىلەمدەرى مەن اكەسىنىڭ «قىمەمشەك تاۋ» اتتى سۋرەتى ەرەكشە قىمبات. ونىڭ باۋىرى نۇرسۇلتاننىڭ جۇمىستارى دا قوعام ماسەلەلەرى تۋرالى تەرەڭ ويعا سۇڭگىتەدى.
– «اداسقاندار» اتتى نۇرسۇلتاننىڭ ءمۇسىنى ءتۇرلى ءدىني سەكتالارعا كىرىپ كەتىپ, قازاق مادەنيەتى مەن داستۇرلەرىمەن بايلانىس ۇزگەن ادامدارعا ارنالعان. شىعارماشىلىققا ادال جاندار ءوز جۇمىستارىندا حالقىنا ءتان تاريح پەن مادەنيەتتى بەينەلەيدى. قازىر ءبىز قازاقستان سۋرەتشىلەر وداعىنىڭ ۇيىمداستىرۋىمەن وتەتىن «الاش» قوزعالىسىنا ارنالعان ءىرى كورمەگە دايىندىق ۇستىندەمىز, - دەيدى گۇلنار. سۋرەتشىنىڭ سوزىنشە, ونىڭ بەس جاسار قىزى ماليكا دا سۋرەتشى بولعىسى كەلەدى ەكەن. قازىردىڭ وزىندە ماليكا ءوز سۋرەتتەرىندەگى قابىلداۋ ەرەكشەلىكتەرى مەن مازمۇننىڭ تەرەڭدىگىمەن جۇرتتى تاڭ قالدىرۋ ۇستىندە.
استانا قالاسى سۋرەتشىلەر وداعىنىڭ توراعاسى توقتار ەرمەكوۆ شابىت سىيلاعان كورمەنىڭ ۇيىمداستىرۋشىلارىنا العىسىن ءبىلدىردى:
– ونەر سالاسىنىڭ گرافيكا, ءمۇسىن, كىلەم توقۋ ونەرى, بەينەلەۋ ونەرى ىسپەتتى ءبىر-بىرىنە ۇقسامايتىن تۇرلەرىنىڭ بۇل كورمەدە ادەمى ۇيلەسكەنى مەنى تاڭ قالدىردى. ەلىمىزدە جۇبانيازوۆتارداي ۇلتىمىزدىڭ ساندىك-قولدانبالى ونەرىن جالعاستىرۋشى دارىندى جانۇيانىڭ بارىنا شەكسىز قۋانىشتىمىن, - دەدى ول.
كورمە 22 قازانعا دەيىن جالعاسادى.
